Archive for August 2008

ഒറീസ്സയും രോഗശാന്തി ശുശ്രൂഷയും

August 31, 2008

റീസ്സയിൽ സംഭവിച്ചുകൊണ്ടിരിക്കുന്ന പോലുള്ള സംഭവങ്ങൾ വിരൽ ചൂണ്ടുന്നത് പിടിപ്പ്‌കെട്ട നീതിന്യയ വ്യവസ്ഥയാണ് നമ്മുടേതെന്നാണ്. ജനങ്ങൾ നിയമം കൈയ്യിലെടുക്കുമ്പോൾ ഭരണകൂടം നോക്കുകുത്തിയായി നിൽക്കുന്നു, ഇത് ഒറീസ്സയിൽ മാത്രമല്ല സംഭവിക്കുന്നത്, ഗുജറാത്ത്,ബീഹാർ, ഉത്തർപ്രദേശ്,ഹരിയാന, തമിഴ്നാട്, എന്തിന് നമ്മുടെ കേരളത്തിൽ പോലും ഇതൊക്കെ നടക്കുന്നു, ചുട്ടുകൊല്ലുന്നതിന് പകരം, വെട്ടിയും കുത്തിയും വണ്ടി ഇടിപ്പിച്ചും, കല്ലുകൊണ്ടിടിച്ചും, ഏതൊക്കെ മാർഗ്ഗത്തിലൂടെ കൊലപാതകം നടത്താമോ അതെല്ലാം നാം പരീക്ഷിച്ചു കഴിഞ്ഞു…. എന്തേ നാം ഇങ്ങനൊക്കെ ?

ഇതിന്റെ ഒക്കെ പ്രധാന കാരണം നാം സംഘടിക്കാൻ ശേഷിയുള്ള ഒരാൾകൂട്ടമായി മാറിക്കൊണ്ടിരിക്കുന്നു എന്നതാണ്, സമൂഹവും ആൾകൂട്ടവും തമ്മിൽ അന്തരമുണ്ട്, ആൾക്കൂട്ടത്തിന് ഏകമനസ്സായിരിക്കും, അവർ ഒന്നും ചിന്തിക്കാറില്ല കൃത്യം നടത്തുക എന്നത് മാത്രമായിരിക്കും അവരുടെ ലക്ഷ്യം അതിന് ഏത് ഹീനമായ വഴിയും തിരഞ്ഞെടുക്കുന്നു, സമൂഹം പ്രവർത്തിക്കുന്നത് അതിന്റെ അലിഖിത നിയമങ്ങളിൽ മുറുകെപിടിച്ചായിരിക്കും., നമ്മുടെ സമൂഹത്തിൽ നിന്നും ആ അന്തസത്ത മാറി ആൾക്കൂട്ടമായി നാം മാറിക്കൊണ്ടിരിക്കുന്നു….. ഈ അടുത്ത സമയത്ത് ഒരു സ്ത്രീയേയും രണ്ട് കുട്ടികളേയും വഴിയിൽ മർദ്ദിക്കുന്ന രംഗം മാധ്യമങ്ങൾ വളരെ ആഘോത്തോടെ സം‌പ്രേക്ഷണം ചെയ്തു, ലജ്ജിച്ചു പോയി എന്തുപറ്റി നമ്മുടെ സമൂഹത്തിന് ? ഇന്ന് അക്രമത്തോട്‌ പ്രതികരിക്കുന്നത് പോലും ജാതി, മത, ഭാഷാ അടിസ്ഥാനത്തിലാണ്

ഏറ്റവും ഓടുവിലത്തേത് ഒറീസ്സയിൽ ഒരു കൂട്ടം മനുഷ്യരെ ജീവനോടെ ചുട്ടുകൊന്നു. ക്യാമറയിൽ പകർത്ത പെട്ട ചിത്രങ്ങൾ ഒഴികെ ബാക്കി എല്ലാം സംസാരിച്ചത് മതാടിസ്ഥാനത്തിൽ ആയിരുന്നു ഒറീസ്സയിൽ ക്രൈസ്തവർ ചുട്ടെരിക്കപ്പെട്ടു രോഗം ഇവിടുന്നാണ് തുടങ്ങുന്നത്,മതേതരത്തെപ്പറ്റി വാതോരാതെ സംസാരിക്കുകയും തികച്ചും വർഗ്ഗിയവാദി ആയി ജീവിക്കുകയും ചെയ്യുന്നവരായി നാം പരിണമിച്ചു.

കേരളത്തിലെ ഒരു രാഷ്ട്രീയ പാർട്ടിപോലും പറഞ്ഞില്ല ഓറീസ്സയിൽ ചുട്ടെരിക്കപ്പെട്ട മനുഷ്യരെ കുറിച്ച് അവർ സംസാരിച്ചത് ക്രൈസ്തവരെ കുറിച്ചായിരുന്നു. ചിന്തയ്ക്ക് തീ പിടിപ്പിക്കുന്ന വാർത്തകൾ ആയിരുന്നില്ല അവയൊന്നും പകരം വർഗ്ഗിയതയ്ക്ക് തീപിടിപ്പിക്കുന്നവ ആയിരുന്നു, മരിച്ചവർ ആരായിരുന്നു ( ഏത് ജാതിക്കാരൻ, ഏത് മതവിശ്വാസി, ഏത് രാഷ്ട്രീയക്കാരൻ )എന്നാണ് ആദ്യം അന്വേഷിക്കുന്നത്, മരിച്ചത് അല്ലങ്കിൽ കൊല്ലപ്പെട്ടത് ഒരു മനുഷ്യൻ ആണ് എന്ന കേവല തിരിച്ചറിവിന് പകരം വർഗ്ഗിയമായി നമ്മൾ കാണാൻ പഠിച്ചു ( മതപരമായി അല്ലെങ്കിൽ രാഷ്ട്രീയപരമായി) അതോ നമ്മളെ അങ്ങനെ പഠിപ്പിച്ചതാണോ? കേരളത്തിൽ കൃസ്തീയ സമൂഹം ഇതിനെതിരെ സമൂഹപ്രാർത്ഥനയും കൂട്ട ഉപവാസവും നടത്തി എന്തായിരുന്നു അവർ ഉയർത്തി കാട്ടിയ മുദ്രാവാക്യം ? ക്രൈസ്തവർക്കെതിരെ ഒറീസ്സയിൽ നടക്കുന്ന അതിക്രമങ്ങൾ അവസാനിപ്പിക്കുക, അവിടെ രാഷ്ട്രപതി ഭരണം ഏർപ്പെടുത്തുക…., ഇത്തരം മുദ്രാവാക്യങ്ങൾ ഉയർന്നു വന്നാൽ ഈ രോഗത്തിന് ഒരിക്കലും ശമനം ഉണ്ടാകില്ല…….എല്ലാ മനുഷ്യനേയും സഹോദരനായി കാണാനും സ്നേഹിക്കാനും പഠിപ്പിച്ച കൃസ്തുദേവന്റെ അനുയായികൾ, മനുഷ്യനെ കൃസ്ത്യാനിയായും, മുസ്ലീമായും, ഹിന്ദുവായും കാണാൻ ശ്രമിക്കുന്നു, മറ്റുമതക്കാരും ഇതെവഴിതന്നെ തിരഞ്ഞെടുക്കുന്നു. സ്വന്തം മത വിശ്വാസികൾ കൊല്ലപ്പെടുമ്പോൾ മാത്രം “മതത്തിന്റെ അന്തസത്ത ഓർക്കുന്നത്” ഒറീസ്സയിൽ ഉണ്ടായപോലുള്ള അക്രമ പ്രവർത്തനത്തിന് പ്രേരണ ആവുകയെ ഉള്ളു. എനിക്ക് വ്യ്ക്തിപരമായി ഈ സംഭവത്തിൽ ഉണ്ടായദുഖം അവിടെ ചുട്ടെരിക്കപ്പെട്ട മനുഷ്യരെ മനുഷ്യരായി കാണാൻ നമ്മുടെ സമുഹത്തിനും മാധ്യമങ്ങൾക്കും കഴിയാതെ പോയി എന്നതാണ്. ഈ കാഴ്ച്ചയാണ് നമ്മളെ പ്രശ്നങ്ങളിലേയ്ക്ക് നയിക്കുന്നത്. കൃസ്ത്യാനിയെ ഹിന്ദുക്കൾ ജീവനോടെ കത്തിച്ചു എന്ന വാർത്തയും, മതമില്ലാതെ വരുന്ന ഇതെവാർത്തയും തമ്മിൽ ഒരുപാട് അന്തരമുണ്ട്. ജീവിക്കുന്ന ഉദാഹരണം നമുക്ക് മുൻപിലുണ്ട്, വഡോദരയിൽ ട്രെയിനിൽ ഹിന്ദുക്കളെ ചുട്ടുകൊന്നു എന്ന വാർത്തയാണ് നൂറ്കണക്കിന് മുസ്ലീംങ്ങളുടെ ജീവൻ ഗുജറാത്തിൽ തല്ലി ഉടച്ചത്, ഈ സംഭവം ഉണ്ടായപ്പോൾ ഇവിടുത്തെ കൃസ്തീയ പുരോഹിത വർഗ്ഗം എവിടെ ആയിരുന്നു ? അന്ന് മരിച്ച മനുഷ്യർക്ക് വേണ്ടി ഒരുനിമിഷം ഇവർക്ക് പ്രാർത്ഥിക്കാമായിരുന്നല്ലോ ? ഒരു പ്രതിക്ഷേധക്കുറിപ്പ് ഇറക്കാമായിരുന്നല്ലോ ? എന്തെ കണ്ടില്ല, ഗുജറാത്തിൽ മുസ്ലീങ്ങൾ കൊല്ലപ്പെട്ടപ്പോഴും നല്ല ഇടയന്മാർ ഒന്നും ഉരിയാടികണ്ടില്ല.!

മതപുരോഹിതന്മാർ മേൽ‌പ്പറഞ്ഞതരത്തിലുള്ള ജുഗുപ്സ്സാവഹമായ മൌനത്തിൽ നിന്നും പുറത്തുവരണം. തങ്ങളുടെ മതവിശ്വാസികൾ കൊല്ലപ്പെടുമ്പോൾ അല്ലങ്കിൽ ആക്രമിക്കപ്പെടുമ്പോൾ മാത്രം പ്രതികരിക്കുന്നവർ ആയി മാറരുത്, സമൂഹത്തിൽ മനുഷ്യന് നേരെ അക്രമം ഉണ്ടാകുമ്പോൾ അതിനെതിരെ ശക്തമായി പ്രതികരിക്കണം അവൻ ഏത് മതക്കാരൻ എന്ന് അന്വേഷിച്ച ശേഷമാവരുത്, അപ്പോൾ ആണ് ദൈവം അവരിൽ ഏൽ‌പ്പിച്ചിരിക്കുന്ന ദൌത്യം അവർ പൂർത്തിയാക്കുന്നത്, അല്ലാതെ രണ്ട് നേരം ബൈബിൾ വായിക്കുന്നതു കൊണ്ടോ, അഞ്ചുനേരം നിസ്കരിക്കുന്നതു കൊണ്ടോ ഒറ്റക്കാലിൽ തപസ്സനുഷ്ടിക്കുന്നതോ പൂജ ചെയ്യുന്നതോ കൊണ്ടല്ല. പുരോഹിത വർഗ്ഗത്തിന് സാധാരണക്കാരുടെ മേൽ ഒരു നിയന്ത്രണം ഉണ്ട് എന്നത് എല്ലാവർക്കും അറിയാവുന്ന കാര്യമാണ്, ഇത്തരം ശക്തി സമൂഹ നന്മയക്കായി ഉപയോഗിക്കണം. അത് ശരിയായി ഉപയോഗിക്കാത്തതിന് നിരവധി ഉദാഹരണങ്ങൾ ചരിത്രം നമ്മേ പഠിപ്പിച്ചിട്ടുണ്ട്. ഒറിസ്സയിൽ പടർന്നു പിടിച്ച വർഗ്ഗിയ, അല്ലങ്കിൽ വംശവിദ്വേഷം എന്ന രോഗത്തിന് രോഗശാന്തി ശിശ്രൂഷ നൽകേണ്ടത് മതങ്ങളെ നയിക്കുന്നവർ തന്നെ……അതാവട്ടെ മറ്റുള്ള മതങ്ങളെ ഉൾക്കൊള്ളാൻ തങ്ങളുടെ മതവിശ്വാസികളെ പഠിപ്പിക്കലും മറ്റ് മതസ്തരെ ബഹുമാനിക്കലും അവരുമായി സഹകരിക്കാനുള്ള മനോഭാവം കെട്ടിപ്പടുക്കലുമാണ്…സത്യസന്തമായ ഇടപെടൽ

ഞാൻ വായിച്ച ചില ഒറീസ്സ രാഷ്ട്രീയം താഴെ ലിങ്ക് ചെയ്തിരിക്കുന്നു

1. പവ്വത്തിൽതിരുമേനിയുടെ ആശിർവാദം ഇതിലെ ഒന്നു പോകു

2. ഒറീസ്സയിലെകൂടുതൽ വാർത്തകൾ

3. ഒറിസ്സയിൽ‌വർഗ്ഗിയകാർഡിറക്കുന്ന ബീ.ജെ.പി

Advertisements

ചെങ്ങറ സമരം (സമരത്തിന്റെ കാണാപ്പുറങ്ങൾ)

August 31, 2008

ചെങ്ങറ സമരം

(സമരത്തിന്റെ കാണാപ്പുറങ്ങൾ)

ചെങ്ങറസമരത്തിന്റെ അകത്തളങ്ങിലേയ്ക്ക് ഒരു യാത്ര, ഇതിൽ നിങ്ങളുടെ അഭിപ്രായങ്ങളും ആശയങ്ങളും ഇവിടെ കമന്റായി പോസ്റ്റു ചെയ്യുക. നിങ്ങളുടെ അഭിപ്രായങ്ങൾ പച്ചയായി മടിക്കാതെ പറയുക. ഈ സമരം ഉയർത്തുന്ന കുറേ ചോദ്യങ്ങൾ അവയുടെ ഉത്തരങ്ങൾ തേടിയുള്ള യാത്ര

1.) ചെങ്ങറ മോഡൽ സമരം എത്രത്തോളം കരണീയമാണ്..?

2.) ചങ്ങറ സമരത്തിൽ ഉന്നയിക്കപ്പെടുന്ന ആവശ്യങ്ങൾ പാലിക്കപ്പെടേണ്ടതാണോ ?

3.) ആദിവാസികളും ദളിദരും ഉയർത്തുന്ന വാദമുഖങ്ങൾ പൊതു സമൂഹത്തിൽ എത്രത്തോളം ചലനങ്ങൾ ഉളവാക്കുന്നു

4.) ഈ സമരത്തിന്റെ നേർക്കാഴ്ച്ച മാധ്യമങ്ങൾ (മുഖ്യ ധാര) വികലമാക്കിയോ

5.) കേരളത്തിലെ രാഷ്ട്രീയ കക്ഷികൾ ഈ സമരം എങ്ങനെ നോക്കികാണുന്നു

6.) ഈ സമരം അനിവാര്യമായ ഒന്നായിരുന്നോ ?

നിങ്ങളുടെ അഭിപ്രായം എന്തു തന്നെ ആയാലും ഉടൻ പോസ്റ്റ് ചെയ്യുക അല്ലെങ്കിൽ ഇവിടെ നിങ്ങളുടെ പോസ്റ്റിന്റെ ലിങ്ക് ഇടുക ചങ്ങറ സമരത്തിലൂടെ ഒരു യാത്ര…….

——————————————————————————————————–

——————————————————————————————————–

ചെങ്ങറയിലെ ഭൂ സമരത്തെകുറിച്ച് ഞാൻ വായിച്ച ഒരു ബ്ലോഗ് ഇത് മാരീചൻ എന്ന ബ്ലോഗറുടെ ഒരു പോസ്റ്റാണ്

എൻ‍.ജെ. ജോജൂന് ഒരു മറുപടി

August 28, 2008

വിദൂഷകനിൽ വന്ന ഒരു പോസ്റ്റിൽ എൻ.ജെ.ജോജു എഴുതിയ കമന്റിലൂടെ പോയപ്പോൾ എന്തെങ്കിലും ഒന്ന് കമന്റണം എന്നുതോന്നി അത് ഇവിടെ ഒരു പോസ്റ്റായ് ഇടുന്നു

എന്റെ മാഷേ, (എൻ.ജെ.ജോജൂ) നിങ്ങൾ സഭാ നേതൃത്വത്തെ തള്ളിപ്പറയണം എന്ന് ആരും പറയുന്നില്ല.! ചെയ്യുന്ന തെറ്റ് അത് ആയിരം തവണശരിയാണ് എന്ന് പറഞ്ഞാലും ശരിആകാറില്ലല്ലോ. ആരും തെറ്റു ചെയ്യുന്നില്ല എന്ന ബാലിശമായ തത്വത്തിൽ മുറുകെപിടിച്ച് സംസാരിക്കരുത്. നിങ്ങൾ ചെയ്യുന്ന ശരികൾ ചിലപ്പോൾ നിങ്ങളുടെ മാത്രം ശരിയായിരിക്കും, അത് ഒരു വലിയ സമൂഹത്തിന് തെറ്റുമാവാം അപ്പോൾ അതിനെ അസഹിഷ്ണുതയോടെ കാണരുത്, അപ്പോൾ തങ്ങൾ ചെയ്ത ശരിയിലെ തെറ്റ് എവിടെ എന്ന് അന്വേഷിക്കണം അങ്ങനെ അന്വേഷിക്കുന്നവനാണ് മനുഷ്യൻ…. പലപ്പോഴും കൃസ്തവ സഭാ നേതൃത്വം ഇങ്ങനെ ഒരന്വേഷ്ണം നടത്താറില്ല…..ബൈബിളിൽ പറഞ്ഞിരിക്കുന്നത് മാത്രമാണ് ശരി അതനുസരിച്ച് സമൂഹം ജീവിക്കണം എന്ന കാഴ്ച്ചപ്പാട് എത്ര ഇടുങ്ങിയിതാണ്…. ഞാനും നിങ്ങളും ഒക്കെ ജീവിക്കുന്ന ഈ സമൂഹത്തൽ മറ്റു മത വിഭാഗങ്ങൾ കൂടെ ജീവിക്കുന്നു എന്ന കാര്യം സഭ പലപ്പോഴും മറക്കുന്നു, ഒരു കൃസ്ത്യാനിക്ക് ബൈബിൾ എത്രത്തോളം പ്രാധാന്യമുള്ളതാണോ അത്രത്തോളം തന്നെ മറ്റു മതക്കാർക്കും അവരുടെ വിശുദ്ധ പുസ്തകങ്ങൾ വിലപ്പെട്ടതാണ്, അതിനെ അപമാനിക്കുകയോ നിന്ദിക്കുകയോ ആവരുത് അതാണ് ഒരു സംസ്ക്കാരമുള്ള മനുഷ്യൻ ചെയ്യേണ്ടത്, മാഷ് സ്വയം ഒന്നു ചിന്തിച്ചുനോക്കു നിങ്ങൾക്ക് എത്രതവണ ഇങ്ങനെ ചെയ്യാൻ കഴിഞ്ഞിട്ടുണ്ടെന്ന്? പിന്നെ താങ്കൾ അക്കമിട്ട് നിരത്തിയ കാര്യത്തിലൂടെ ഒന്ന് കടന്നുപോകാം

1.) സഭാനേതൃത്വത്തെ വിശ്വാസികള്‍ തള്ളിപ്പറയണം. പിന്നെ സര്‍ക്കാരിന് എന്തു തോന്യവാസവും ആവാമല്ലോ .

ഇവിടെ ഒരുകാര്യം മനസ്സിലാകാത്തത്, സഭ എന്നത് ഒരു രാഷ്ടീയ പ്രസ്ഥാനമാണോ ? അല്ലങ്കിൽ പിന്നെ ഭരണകാര്യങ്ങളിൽ എന്തിന് ഇടപെടുന്നു? അതോ കോൺഗ്രസ്സ്=കത്തോലിക്ക സഭ എന്ന ഇക്വേഷൻ ആണോ ഇതിന് പിന്നിൽ, കത്തോലിക്ക സഭ ഇല്ലായിരുന്നെങ്കിൽ കേരളത്തിലെ സകലമനുഷ്യരേയും മുക്കികമ്മ്യൂണിസ്റ്റാക്കിയേനെ എന്ന് മാഷ് പേടിക്കുന്നുണ്ടോ ? ഈ സർക്കാർ കാണിച്ച തോന്ന്യവാസങ്ങൾ എന്തൊക്കെ ആയിരുന്നു ? സാധാരണക്കാരന്റെ കുട്ടികൾക്കു കൂടെ ഉന്നത വിദ്യാഭ്യാസം നൽകണം എന്ന് ശഠിച്ചതോ ? അതോ കിടപ്പാടം ഇല്ലാത്തവർക്കായി സർക്കാർ വക കയ്യേറ്റഭൂമി തിരിച്ചു പിടിച്ചതോ, കുട്ടികളെ കണ്ണൂതുറന്ന് തനിക്കുചുറ്റും നോക്കാൻ പഠിപ്പിച്ചതോ ? ( മതമില്ലാത്ത ജീവൻ) ? ( സർക്കാരിന് മേൽ പറഞ്ഞ പ്രവർത്തികൾ ഒന്നും നൂറ് ശതമാനം പൂർണ്ണമായും ശരിയായും ചയ്യാൻ പറ്റിയില്ല അത് ഒരു നഗ്ന സത്യമാണ് , വഴി മുടക്കികൾ കൂട്ടത്തിലും പുറത്തും ധാരാളം ഉണ്ടല്ലോ)

2)സര്‍ക്കാരിന്റെ ജനാധിപത്യവിരുദ്ധ-ന്യൂനപക്ഷവിരുദ്ധ-ഭരണഘടനാവിരുദ്ധ നടപടികള്‍ക്കെതിരേ കോടതിയെ സമീപിയ്ക്കരുത്. പിന്നെ സര്‍ക്കാരിന് എന്തു തോന്യവാസവും ആവാമല്ലോ അല്ലേ.

താങ്കൾ കണ്ടെത്തിയ, സര്‍ക്കാരിന്റെ ജനാധിപത്യവിരുദ്ധ-ന്യൂനപക്ഷവിരുദ്ധ-ഭരണഘടനാവിരുദ്ധ നടപടികള്‍ എന്തൊക്കെ ആയിരുന്നു ? ഒന്ന് അക്കമിട്ട് നിരത്തിപറയാമോ ? ഞാൻ ഒരു ന്യൂനപക്ഷ സമുദായക്കാരനല്ലാത്തതിനാൽ എനിക്ക് നിങ്ങൾക്കെതിരെ അതായത് ന്യൂനപക്ഷത്തിനെതിരെ സർക്കാർ നടത്തിയ കടന്നുകയറ്റം എന്താണെന്ന് പെട്ടന്ന് മനസ്സിലാകുന്നില്ല.! നിങ്ങൾക്ക് സംഭവിച്ചപോലെ എന്റെ കാഴ്ച്ചയ്ക്കും എന്തെങ്കിലും പറ്റിയോ എന്നറിയാൻ ആണ് ? ഭൂരിപക്ഷത്തെ ന്യൂനപക്ഷം ഭരിക്കുന്നതാണല്ലോ ജനാതിപത്യം, എന്നാൽ ഇവിടെ ന്യൂനപക്ഷം ഭൂരിപക്ഷത്തെ ആണല്ലോ കഴിഞ്ഞ കുറേ കാലങ്ങളായി ഭരിക്കുന്നത്, അതിന് ചറിയ ഒരു മാറ്റം വന്നപ്പോൾ ഇങ്ങനെ അങ്ങ് ഹാലിളികിയാലോ മാഷെ.

എന്താണ് ന്യൂനപക്ഷ വിരുദ്ധത കൊണ്ട് അർത്ഥമാക്കിയത് എന്ന് മനസ്സിലായില്ല. ന്യൂന പക്ഷത്തിന്റെ മൌലികമോ അല്ലാത്തതോ ആയ ഏത് അവകാ‍ശമാണ് ഹനിക്കപ്പെട്ടത് ? പഠിക്കാനും പഠിപ്പിക്കാനുമുള്ള അവകാശം നിഷേധിച്ചോ (പണം പിരിക്കൽ വേണ്ടന്നല്ലെ പറഞ്ഞൊള്ളു) നിയമാനുസൃതമായി വിദ്യാലയങ്ങൾ തുടങ്ങാൻ അനുമതി നിഷേധിച്ചോ ? ( കൃസ്ത്യൻ മാനേജ്‌മെന്റുകൾ നിയമാനുസൃതമല്ലാത്ത നിരവധി വിദ്യാഭ്യാസ സ്ഥാപനങ്ങൾ നടത്തുന്നുണ്ട് മാഷിന് തെളിവ് വേണോ അല്ലങ്കിൽ എന്തിനാ തെളിവ്‌ ഏഴാം ക്ലാസ്സിലെ പുസ്തകം ഒന്നൂടെ വായിച്ചട്ട് കണ്ണ് വലിച്ച് തുറന്ന് തിരുമേനിമാരെ അല്ലങ്കിൽ പിതാ‍ക്കന്മാരെ ഭയക്കാതെ ഒന്നു നോക്കിയാൽ മതി നല്ല വ്യക്തമായി കാണാൻ പറ്റും യൂ.കെ.ജി മുതൽ മുകളിലേയുക്കുള്ള ജാലകം,

പിന്നെ സർക്കാർ ശമ്പളം നൽകുന്ന അധ്യാപകരെ സർക്കാർ തന്നെ തിരഞ്ഞെടുക്കും (പി.എസ്.സി) എന്നുപറഞ്ഞതാണോ ന്യൂനപക്ഷവിരുദ്ധത. ? ക്രൈസ്തവൻ എന്ന ചട്ടക്കുടിന്റെ പുറത്ത് നിന്നും നോക്കുക മേല്പറഞ്ഞത് അനിവാര്യമായ ഒന്നല്ലെ ? .സ്കൂളുകൾ നടത്താൻ ഭരണഘടന അനുവാദം തരുന്നത് സർക്കാർചിലവിൽ മതപ്രചരണം നടത്താനല്ല. സംസ്ഥാന വിദ്യാഭ്യാസ ചട്ടങ്ങൾക്കനുസൃതമായി വേണം അവിടെ പഠന രീതികൾ തയ്യാറാക്കാൻ. ദൌർഭാഗ്യം എന്ന് പറയട്ടെ പലപ്പോഴും കൃസ്ത്യൻ മാനേജ്‌മെന്റുകൾ ഇവയൊക്കെ കാറ്റിൽ പറത്തുകയാണ് ഏറ്റവും അവസാനത്തെ പ്രഖ്യാപനം ഒറീസ്സയിലെ കലാപത്തിന് 29.08.2008 ൽ കേരളത്തിലെ സഭയുടെ ഉടമസ്ഥതയിലുള്ള വിദ്യാഭ്യാസ സ്ഥാപനങ്ങൾ അടച്ചിടും എന്നത്. നിങ്ങൾ പറഞ്ഞ തലക്കെട്ടിൽ ചിലമാറ്റം വരുത്തി, മേൽ‌പ്പറഞ്ഞ പ്രവർത്തിക്ക് ചേരുന്നതരത്തിൽ എഴുതട്ടെ -ന്യൂനപക്ഷ സമുദായത്തിന്റെ ജനാധിപത്യവിരുദ്ധ-ഭരണഘടനാവിരുദ്ധ നടപടികള്‍“

3)സര്‍ക്കരിനെതിരെ പ്രതികരിയ്ക്കുന്നവരെ നാടുകടത്തണം. പിന്നെ സര്‍ക്കാരിന് എന്തു തോന്യവാസവും ആവാമല്ലോ .

സർക്കാരിനെതിരെ പ്രതികരിക്കുമ്പോൾ അത് സഭയുടെ താൽ‌പ്പര്യം ( സാമ്പത്തിക ലാഭം മാത്രം) മാത്രം കണക്കിലെടുത്താവരുത് . അതിന് സാമൂഹ്യ നന്മയിൽ അധിഷ്ടിത മായ ഒരു ലക്ഷ്യം ഉണ്ടായിരിക്കണം, അത് മതേതരത്തിന് തുരംഗം വയ്ക്കുന്ന സങ്കുചിത ചിന്താഗതി ആയിരിക്കരുത്. ഭൂരിപക്ഷത്തിന് ( മതാടിസ്ഥാനത്തിലല്ല) ഗുണമുണ്ടാകുകയും അതിലൂടെ സാമൂഹ്യ പുരോഗതിയ്ക്ക് വകവയ്ക്കുകയും ചെയ്യുന്ന കാര്യങ്ങളാണെങ്കിൽ അവയെ പിന്താങ്ങണം. കഴിഞ്ഞ കുറേ കാലങ്ങളായി സഭയുടെ മിഷ്ണറി പ്രവർത്തനം ഒരു കോർപ്പറേറ്റ് ബിസ്നസ്സ് സ്ഥാപനം എന്ന നിലയിലേയ്ക്ക് ചുരുങ്ങിപോയി. ഒരുകാലത്ത് കേരളത്തിലെ പാതിരിസമൂഹത്തിന് സമൂഹത്തിൽ നല്ല വില ഉണ്ടായിരുന്നു ഇന്ന് അത് എത്രത്തോളം ശേഷിക്കുന്നു എന്ന് കണ്ടറിയേണ്ടിയിക്കുന്നു. വിവാദങ്ങളിൽ സ്വയം തലവയ്ക്കുന്ന തിളയ്ക്കുന്ന രക്ത വാഹികളായി മാറിപ്പോയിരിക്കുന്നു, ആത്മീയതയിൽ നിന്നും ഉണ്ടാകേണ്ട പ്രസന്നതയ്ക്കും,ശാന്തിക്കും പകരം, ക്രോധവും, ക്ഷോഭവും ത്രസിക്കുന്ന മുഖശ്രീ ആണ് പല വൈദികരുടേയും മുഖത്ത് നിഴലിക്കുന്നത്, ( ടീ.വി. പ്രോഗ്രാമുകളിൽ പാത്രിരിമാരുടെ ശരീരഭാഷ ശ്രദ്ധിക്കുക) എന്തുപറ്റി കേരളത്തിലെ വൈദികർക്ക്………………………..

സർക്കാരുകൾ കാണിക്കുന്ന തോന്ന്യാസങ്ങളെ ചോദ്യം ചെയ്യാൻ ഇവിടെ ഒരു പ്രതിപക്ഷമില്ലെ., മതങ്ങൾ അല്ലങ്കിൽ മതത്തിന്റെ പേരിൽ ഇതിൽ ഒരു ഇടപെടൽ ആവശ്യമാണോ ? മനുഷ്യരുടെ പേരിൽ ഇടപെട് അതല്ലെ അതിന്റെ ശരി. പണ്ടൊരിക്കൽ ഒരു കന്യാത്രീ നോർത്ത് ഇന്ത്യയിൽ ബലാത്സഗം ചെയ്യപ്പെട്ടു, അതിന്റെ പേരിൽ ഇവിടെ മുഴുവൻ കൃസ്ത്യാനികളും ( ഒരുപക്ഷേ) ഇതിനെതിരെ ഇവിടെ പ്രക്ഷോഭം നടത്തി ഇതിൽ മിക്കവാറും എല്ല സഭകളിലേയും കന്യാസ്ത്രീകളും, വികാരികളും പങ്കെടുത്തു ആ പ്രതിക്ഷേധത്തെ കേരളത്തിലെ ജനങ്ങൾ രണ്ട്‌കൈയ്യും നീട്ടി സ്വീഅകരിച്ചു., അത് അനിവാര്യമായ ഒന്നാണെന്ന് സമ്മതിക്കുകയും ചെയ്യുന്നു. ഇതിൽ ഒട്ടും ശരിയല്ലാത്ത പ്രവർത്തി ഒളിഞ്ഞുകിടന്നിരുന്നു.., ഒരു വർഗ്ഗ തിരിവ്…, അതായത് അവിടെ ഉയർത്തി കാട്ടപ്പെട്ടത് ഒരു കന്യാസ്ത്രീ ബലാത്സംഗം ചെയ്യപ്പെട്ടു എന്ന താണ്….പക്ഷെ അതിൽ നിന്നും എത്രയോ മഹത്തരമായേനെ അത് ഒരു സ്ത്രീക്കെതിരെ നടന്ന അതിക്രമമായി അതിനെ ഉയർത്തികാട്ടുകയും, പിന്നീട് ഉണ്ടായ സ്ത്രീ പീഠനങ്ങളിൽ സഭയുടെ പ്രതിക്ഷേധം രേഖപ്പെടുത്തുകയും ചെയ്തിരുന്നെങ്കിൽ ?! കേവലം ക്രൈസ്തവർക്കായി മാത്രം (എല്ലാ ക്രൈസ്തവർക്കും വേണ്ടി അല്ല അതിൽ വേണ്ടപ്പെട്ടവർക്ക് മാത്രം., അല്ലേങ്കിൽ അഭയ കേസ്സ് 16 വർഷം നീളില്ലല്ലോ. അനുപമ കേസ്സ് ഉണ്ടാവുകയിമില്ല) പ്രതികരിക്കുന്ന വെറും ഒരു സഹകരണ പ്രസ്ഥാനമായി മാറിപ്പോയി സഭ. കന്യാസ്ത്രീകളെ സഭ ഉയർത്തികാട്ടുന്നത് സാമൂഹ്യ സേവനം ചെയ്യുന്ന സഹോദരിമാർ എന്നാണ്. പൊതു സമൂഹത്തിനോ അതോ ഏതെങ്കിലും പ്രത്യേക സമൂഹത്തിനോ എവിടെയാണ് ഇവരുടെ സേവനം ലഭിക്കുന്നത് ?. (കന്യാസ്ത്രീമാർ നടത്തുന്ന ജീവകാരുണ്യ പ്രവർത്തനം സുസ്ത്യർഹമായ സേവനം തന്നെ അത് മാനിക്ക പ്പെടേണ്ടതുതന്നെ).

4)തങ്ങള്‍ക്കനുകൂലമല്ലാത്തതിനെയൊക്കെ ഇല്ലാതാക്കുക. എന്നിട്ട് കമ്യൂണിസ്റ്റുപാര്‍ട്ടിയുടെ സര്‍വ്വാ‍ധിപത്യം.

ഇത്രയും കടന്ന് ചിന്തിക്കണോ ഇത് കേരളമല്ലെ മാഷെ ! സ്വാശ്രയത്തിന്റെ കാര്യത്തിൽ ഇതല്ലെ സഭ സ്വീകരിച്ച് നിലപാട്‌ തങ്ങള്‍ക്കനുകൂലമല്ലാത്തതിനെ-യൊക്കെ ഇല്ലാതാക്കുക. എന്നിട്ട് വിദ്യാഭ്യാസ മേഖലയിൽ സര്‍വ്വാ‍ധിപത്യം. ഈ ഹിഡൻ അജണ്ടതന്നെ ആണ് സഭപിൻ തുടരുന്നതും ഈ ദീർഘവീക്ഷണമാണ് കേരളത്തിൽ ക്രൈസ്തവസഭ സാമൂഹ്യ സേവനം എന്ന നിലയിൽ വിദ്യാഭ്യാസത്തിന്റെ കുത്തകകൾ ആയത് “ കേരളത്തിലെ മൊത്തം വിദ്യാഭ്യാസ സ്ഥാപനങ്ങളും അതിൽ ക്രൈസ്തവരുടെ എത്ര എന്നും ഉള്ള കണക്ക് ഈ കാഴ്ച്ചപ്പാടിനെ സാധൂ‍കരിക്കുന്നു. പാഠ പുസ്തക വിവാദം വന്നപ്പോഴും മറ്റ് ചില സാമൂഹ്യ പ്രശ്നം വന്നപ്പോഴും സ്കൂളുകൾ അടച്ചിടുക എന്ന സമരമുറ സഭ പുറത്തെടുക്കുന്നു. സർക്കാർ ശമ്പളം പറ്റുന്ന അധ്യാപകർ ഗവണ്മെന്റിന്റെ ഭാഗമാണ്, അവർ എപ്പോൾ എന്തുചയ്യണം എന്ന് തീരുമാനിക്കാനുള്ള അവകശം ഇന്ന് സഭയ്ക്ക് തീറ് കിട്ടിയിരിക്കുന്നു. പവ്വത്തിൽ തിരുമേനിയുടെ അഹന്ത നിറഞ്ഞ പ്രസ്ഥാവനകൾ ഈ വീക്ഷണകോണിൽ നിന്നും രൂപിഭവിച്ചതാവാം.

കറുത്ത കുർബാന നടത്തുന്നവർ

August 17, 2008

കറുത്ത കുർബാന നടത്തുന്നവർ

കേരളത്തിലെ മത പുരോഹിതന്മാർ പഴയ കണ്ടെത്തലുകൾ പുതിയ രൂപത്തിൽ വിളമ്പുന്നു. കേരളം ഭരിക്കുന്നവർ കുട്ടിചാത്തന്മാർ ആണെന്നാണ് മൂവറ്റുപുഴരൂപത അദ്ധ്യക്ഷൻ എബ്രഹാം മാർ യൂലിയോസ് പറയുന്നത്, പതവിക്ക് ചേരാത്ത പ്രസംഗത്തിലൂടെ സ്വയം അപഹാസ്യരാവുകയാണ് കേരളത്തിലെ പാതിരി സമൂഹം. ഈ അവതാരങ്ങൾ ഉണ്ടായിരുന്നില്ലങ്കിൽ കേരളം നിരക്ഷരരാൽ കുമിഞ്ഞുകൂടും എന്നാണ് ഇടയ്ന്മാരുടെ പുതിയ കണ്ടെത്തെൽ.

ഒരുകാര്യം ചോദിച്ചോട്ടെ, കേരളത്തിൽ ഇടതുപക്ഷജനാതിപത്യ മുന്നണിയുടെ നേതൃത്വത്തിൽ 12വർഷം മുൻപ് അധിഅകാരത്തിൽ വന്ന സർക്കാർ ഒരു പ്രോഗ്രാം തുടങ്ങുകയുണ്ടായി പാതിരിമാർ കേട്ടിട്ടുണ്ടാകും “ സാക്ഷര കേരളം സുന്ദര കേരളം” എന്ന്. ഈ മഹത് സംഭവത്തിൽ കേരളത്തിലെ വിദ്യാഭ്യാത്തിന്റെ ഹോൾസെയിൽ ഡീലർ മാരായ കേർപ്പറേറ്റ് തിരുമേനിമാരുടെ പങ്ക് ഒന്നു വ്യക്തമാക്കാമോ ? അന്ന് ഈ സാമൂഹ്യ പ്രവർത്തനത്തിൽ ഇവിടുത്തെ ളോഹ ഇട്ട പുണ്യവാൾന്മാരും , തിരുവസ്ത്രമണിഞ്ഞ കർത്താവിന്റെ മണവാട്ടിമാരും എന്ത് സംഭാവന നൽകി ? ആദിവാസി ഊരിലും, കോളനികളിലും ഉറക്കം പോലും ഉപേക്ഷിച്ച് പ്രവർത്തിച്ചത്, പാതിരിമാരോ കന്യാസ്ത്രീകളോ അല്ല, ഇവിടുത്തെ സാധാരണക്കാരായ, ജോസഫും മേരിയും, ബഷീറും, സുകുമാരനുമൊക്കെയായിരുന്നു. ഇവർ പ്രതിഫലേഛ ഇല്ലാതെ ആണ് തിരുമേനി അന്ന് പ്രവർത്തിച്ചത്, അക്ഷരം എന്ന അത്ഭുത വിളക്ക് നിരക്ഷരരായ പാവങ്ങൾക്ക് മുന്നിൽ തെളിച്ചതിലൂടെ അവർ ചെയ്ത ദൈവവേല നിങ്ങൾ നൂറ്റാണ്ടുകളായി ചെയ്യുന്നതിലും എത്രയോ മഹത്തരമാണ്. അവർക്ക് മുന്നിൽ നിങ്ങൾ എത്രയോ അൽ‌പ്പന്മാർ ആണ്.

2000പരം വർഷങ്ങളായി കർത്താവ് തമ്പുരാൻ നിലനിന്നുപോരുന്നത് പാതിരിമാരുടെ സ്തുതിപാടൽ കൊണ്ടല്ല, എല്ലാം അറിയാനും ചയ്യാനും കഴിവുള്ള ദൈവത്തിന് തന്റെ അസ്തിത്വം നിലനിർത്താൻ ഇത്തരക്കാരുടെ വാചക കസർത്തിന്റെ ആവശ്യകതയുമില്ല. ദൈവ വിശ്വാസം എന്നത് ഒരു പുസ്ത്കത്തിലൂടെ മായിച്ച കളയാവുന്ന ഒന്നല്ല. അങ്ങനെ ആയിരുന്നെങ്കിൽ ഈ ലോകത്തിൽ നിന്നും എന്നേ ദൈവവിശ്വാസം നഷ്ടപ്പെട്ടേനെ. കുറേ വർഷങ്ങൾ പിന്നോട്ട് നടന്നാൽ തിരുമേനിമാർ ഇടയലേഖനം ഇറക്കിയാൽ അതിന് ഉടൻ തന്നെ കുഞ്ഞാടുകൾക്കിടയിൽ പ്രതികരണം ഉണ്ടാകുമായിരുന്നു, ഇന്ന് ആഴ്ച്ചയിൽ രണ്ടെണ്ണം ഇറക്കിയിട്ടും കുഞ്ഞാടുകൾ തൊഴുത്തിൽ തന്നെ ഇങ്ങനെപോയാൽ ഈ ളോഹയ്ക്ക് എന്ത് വില എന്റെ കർത്താവേ എന്ന വീണ്ടുവിചാരമാവാം ജുഗുപ്സാവഹമായ അഭിപ്രായ പ്രകടനങ്ങൾ നടത്താൻ ഇവറ്റകളെ പേരിപ്പിക്കുന്നത്.

ഇന്ന് കേരളം ഭരിക്കുന്നവർ ദൈവം ഇല്ലന്ന് അടക്കം പറയുന്നവർ ആണ് എന്നാണ് ബിഷപ്പിന്റെ അവകാശവാദം, തിരുമേനി ചെയ്യുന്ന പോലെ ദൈവവേല തൊഴിലാക്കിയവരല്ല കമ്മ്യൂണിസ്റ്റുകൾ അതുകൊണ്ട് തന്നെ ദൈവം ഉണ്ട് എന്ന് സ്ഥാപിക്കേണ്ട ആവശ്യകതയും അവർക്കില്ല. അവരുടെ കർമ്മ പഥം ബൈബിൾ വായിക്കലോ അത് വ്യാഖ്യാനിക്കലോ അല്ല, കർത്താവ് തമ്പുരാൻ തന്റെ ജീവിതചര്യയാക്കിയ മറ്റുള്ളവർക്കായി ജീവിക്കുകയും പ്രവർത്തിക്കുകയും ചെയ്യുക എന്ന അപ്തവാക്യത്തിൽ അതിഷ്ടിതമായ ജീവിതം, കാറൽ മക്സ്, എംഗത്സ്, ചെഗുവേര, മാവോ, സ്റ്റാലിൻ, ലെനിൻ എല്ലാവരും അങ്ങനെ തന്നെ ജീവിച്ച് മരിച്ചവർ ആണ് ഈ കുഞ്ഞ് കേരളത്തിലും അങ്ങനെ ജീവിച്ച നിരവധി സഖാക്കന്മാർ ഉണ്ടായിരുന്നു. “ അദ്വാനിക്കന്നവർക്കും ഭാരംചുമക്കുന്നവർക്കും വേണ്ടി ജീവിക്കുന്നവർ” അതാണ് ഒരു യദാർത്ഥ കമ്മ്യൂണിസ്റ്റ്

യേശു മുൻപോട്ട് വച്ച സാമൂഹ്യ പ്രശ്നങ്ങളിൽ കൃസ്തീയ സഭകൾ എത്രത്തോളം ആത്മാർത്ഥത കാണിച്ചിട്ടുണ്ട്, അധികാരത്തിന്റെ ചിഹ്നമായ തൊപ്പിയും ക്രൂശിതനായ കർത്താവിന്റെ അടയാളമുള്ള അംശവടിയും ചുമക്കുന്ന അധികാരത്തിന്റെ പുത്തൻ കേന്ദ്രങ്ങൾ എത്ര അദ്വാനിക്കുന്നവനെ തന്നോട് ചേർത്ത് നിർത്തി അവന്റെ കണ്ണീരൊപ്പിയിട്ടുണ്ട്, ബുള്ളറ്റ് പ്രൂഫ് ക്യാബിനിൽ ഇരുന്നല്ലെ ഇവർ ദൈവ വേല ചെയ്തിട്ടുള്ളു. സഭയുടെ വിദേശനിർമ്മിത, അല്ലങ്കിൽ സ്വദേശ നിർമ്മിത ലക്ഷ്വറി കാറിൽ കുഞ്ഞാടുകൾക്കിടയിലൂടെ മിന്നൽ പിണർപോലെ സഞ്ചരിക്കുന്ന ഇവർക്ക് നടക്കാൻ വഴിയില്ലാത്തവന്റെ ദുഖം എങ്ങനെ മനസ്സിലാകും.

തിരുമേനി തന്റെ പ്രസംഗത്തിലുടനീളം വ്യക്തി ഹത്യയ്ക്ക് ശ്രമിക്കുന്നത് കാണാം, പഴയ ഒരു കെ.എസ്.യു ക്കാരന്റെ ധാർഷ്ഠ്യം. എം.എ. ബേബി തന്റെ വിദ്യാഭ്യാസ കാലത്ത് സാമൂഹികവിരുദ്ധ പ്രവർത്തനത്തിലേർപ്പെട്ടതിന് ഇന്ദിരഗാന്ധി അറസ്റ്റ് ചെയ്യിപ്പിച്ച് ജയിലിലടപ്പിച്ചിരുന്നു. തിരുമേനി വെച്ച വെടിക്ക് പല അർത്ഥങ്ങൾ ഉണ്ട് ആത് കുഞ്ഞാടുകളുടെ അടുത്ത് വിളമ്പിയാൽ പോരെ. എല്ലാവർക്കും മനസ്സിലാകുന്ന ഭാഷയിൽ പറഞ്ഞാൽ അടിയന്തിരാവസ്ഥകാലത്ത് എം.എ. ബേബി ജിയിലിൽ അടയ്ക്ക് പെട്ടിട്ടുണ്ട് എന്നല്ലെ തിരുമേനി അതിന്റെ ശരി, അന്നത്തെ ചരിത്രം കൂടെ തിരുമേനി അങ്ങ് പറയ്, ഇന്ത്യൻ ഞനാധിപത്യത്തിന്റെ കറുത്ത ദിനങ്ങൾ എന്നാണ് ചരിത്രം അതിനെ വിശേഷിപ്പിക്കുന്നത്.

അതിന് മുൻപ് രക്തത്തിൽ മുക്കി എഴുതിയ  വേറൊരു മഹാചരിതം കൂടെ സഭയ്ക്ക് അവകാശപ്പെടാനുണ്ട്. കേരളത്തിലെ ഒരു വിഭാഗം കൃസ്ത്യാനികളും പാതിരിമാരും കോൺഗ്രസ്സും ചേർന്ന് “ കറുത്ത കുർബാന നടത്തിയ നാളുകൾ” നഗ്നമാക്കപ്പെട്ട മനുഷ്യാവകാശത്തിനു മേൽ ചെകുത്താന് വേണ്ടി, മനുഷ്യ ചർമ്മത്തിൽ പൊതിഞ്ഞ വേദപുസ്തകം വായിച്ചവർ വിമോചന സമരം എന്തിനെന്ന് അറിയാത്ത നിരപരാധികളെ അന്ന് ബലിതർപ്പണം ചെയ്തു. ഇതിന് പ്രത്യുപകാരമായി കേരളത്തിലെ ആദ്യത്തെ, അല്ലങ്കിൽ ലോകത്തിലെ തന്നെ ആദ്യത്തെ ബാലറ്റ് പെയ്പ്പറിലൂടെ അധികാരത്തിൽ വന്ന കമ്മ്യൂണീസ്റ്റ് മന്ത്രി സഭയെ താഴെ ഇറക്കാൻ സഭയ്ക്കു കഴിഞ്ഞു, ഇത് കറുത്ത കുർബാനയ്ക്കുള്ള സാത്താന്റെ പ്രതിഫലമായിരുന്നു.

വിദ്യാഭ്യാസം വിവരമില്ലായ്മയ്ക്ക് ഇന്നുവരെ തടസ്സമായിട്ടില്ല അതാണ് തിരുമേനിയുടെ പ്രസംഗത്തിൽ നിന്നും മനസ്സിലാകുന്നത്, “എം .എ ബേബി എന്ന് കേൾക്കുമ്പോൾ എം.എ. ക്കാരൻ ആണ് എന്ന് വിചാരിക്കേണ്ട, എന്ന് ഛർദ്ദിക്കുന്ന തിരുമേനി തന്റെ ബുദ്ധിപരമായ പാപ്പരത്തത്തെ മറച്ചുവയ്ക്കാൻ തയ്യാറല്ല എന്നു തുറന്ന് സമ്മതിക്കുന്നു. സാധാരണ ബിരുദത്തിന്റെ സൂചന പേരിന്റെ വലത് ഭാഗത്തല്ലെ തിരുമേനി എഴുതുന്നത്, ഡോക്ടർ പോലുള്ള സ്ഥാനപ്പേരുകൾ ആണ് പേരിന്റെ ഇടതുഭാഗത്ത് സൂചിപ്പിക്കുന്നത്…… സ്വയം വിഡ്ഡി ആയതിനു പുറമേ കേൾവിക്കാരനെ അങ്ങനെ വിചാരിക്കരുതെ എന്ന് ഉദ്ബോധിപ്പിക്കുന്നു. പുറമെ ബേബി വിഷം എന്ന വിളിപ്പേരിൽ ആണ് അറിയപ്പെട്ടിരുന്നത്, ഇപ്പോൾ അത് കാളകൂടമായിക്കാണും തിരുമേനി ഉദ്ദേശിച്ച ആവിഷം “ കമ്മ്യൂണിസമാണോ” ? ഇപ്പോഴത്തെ ഈ വിദ്യാഭ്യസ പരിഷ്ക്കരണം ഇന്ധിര ഗാന്ധിയോടുള്ള പ്രതികാരമാണത്രെ. ഏഴാം ക്ലാസ്സിലെ വിദ്യാർത്ഥികൾ ഇന്ദിരാജിയുടെ പേരമക്കൾ

ആണോ ? കോട്ടയം കുതിരവട്ടം ആകുമോകർത്താവേ!

ആന്റപ്പന്റെ ഓരോ ആപ്പുകളെ! 50:50 എന്ന അനുപതത്തിൽ തുടങ്ങിയ കളി എവിടെ ചന്നവസാനിക്കും എന്നറിയാതെ കേരളത്തിലെ രക്ഷകർത്താക്കൾ നട്ടം തിരിയുന്നു. കോൺഗ്രസ്സുകാരനായ ആന്റപ്പൻ തുറന്നുവിട്ട സ്വാശ്രയം എന്ന ദുർഭൂതത്തെ സഭതങ്ങളുടെ ചോരകൊടുത്ത് വളർത്തി. ഇനീ വളർത്ത്കൂലി കിട്ടാതെ ഈ ഭൂതത്തെ കുടത്തിൽ അടയ്ക്കുക സാധ്യമല്ല. ആന്റപ്പന്റെ പട്ടാളാം മൊത്തമായി വന്നാലും ഈ ഭൂതം കുലുങ്ങില്ല. ഈ ദുർഭൂതം ബാധിച്ച തിരുമേനിമാർ ആണ് കേരളത്തിന്റെ മുകളിൽ ഒരു പുത്തൻ വിപത്തായി പത്തിവിരിച്ചുനിൽക്കുന്നത്.

“ ആരുടെയെങ്കിലുമൊക്കെ വിശ്വാസം ആരെ

എങ്കിലുമൊക്കെ രക്ഷിക്കട്ടെ” ( വാർത്തയോട് കടപ്പാട് ദീപിക 170808 )‘

വീ.കെ.ബാല

17082008

സൃഷ്ടിക്കപ്പെടുന്ന വാർത്തകൾ

August 14, 2008

“ അകാലത്തിൽ പൊഴിഞ്ഞ കുസുമം “

അനുപമ മേരി

സൃഷ്ടിക്കപ്പെടുന്ന വാർത്തകൾ

സിസ്റ്റർ അനുപമയുടെ ആത്മഹത്യയെ തുടർന്നുണ്ടായ പ്രവർത്തനങ്ങൾ കൈകാര്യം ചെയ്യുന്നതിൽ മന്ത്രി എം.എ.ബേബി കാണിച്ച അമിത താത്പര്യത്തിനു പിന്നിൽ ഗൂഡലക്ഷ്യങ്ങൾ ഉണ്ടെന്ന് “പരക്കെ “സംശയം (ദീപിക .കോമിൽ വന്ന വാർത്തയുടെ ചില ഭാഗങ്ങൾ14-08-2008) വനിതാക്കമ്മീഷന്റെ “അമിത“ താത് പര്യവും സംശയം ഉണ്ടാക്കിയിട്ടുണ്ട്. കൂടാതെ വനിതാ കമ്മീഷനെതിരെ കത്തിക്കയറുമ്പോൾ ചില ഉദാഹരണവും “പ്രത്യേക ലേഖകൻ “ നിരത്തുന്നു. വാർത്ത നിർത്തുമ്പോൾ ഒരു ഭംഗിക്കായി ഇത്രയും എഴുതി നിർഭാഗ്യകരമയ സംഭവത്തിന്റെ സത്യം പുറത്ത്‌വരണമെന്ന കാര്യത്തിൽ ആർക്കും രണ്ടഭിപ്രായമില്ല ……………..

പതിനാറ് വർഷം മുൻപ് ഇതുപോലെയോ ഇതിലും അൽ‌പ്പം കഠിനമായോ ദീപികയുടെ പ്രത്യേക ലേഖകൻ അധ്വാനിച്ചിരുന്നു, സിസ്റ്റർ അഭയ കൊല്ലപ്പെട്ടപ്പോൾ! പിന്നെ പലപ്പോഴും, ഇങ്ങനെ എഴുതേണ്ടി വന്നിട്ടുണ്ട് കൃസ്ത്യാനിയുടെ സ്വന്തം പത്രത്തിന്. ആദ്യത്തെ ലേഖനത്തോടു കൂടി എന്തെ ഇത്തരം വാർത്തകൾ നിർത്തുവാൻ കഴിഞ്ഞില്ല !?. ( സംഭവങ്ങൾ ആവർത്തിക്കപ്പെടുമ്പോൾ വാർത്തയും ആവർത്തിക്കപ്പെടുന്നു) അഭയയുടെ മരണവുമായി ബന്ധപ്പെട്ട് കത്തോലിക്ക സഭയ്ക്ക്, ബൌദ്ധികവും, കായികവും, സാമ്പത്തികവുമായ കുറേ ഏറേ അഭ്യാസങ്ങൾ കാണിക്കേണ്ടി വന്നിട്ടുണ്ട്. അന്നത്തെ മുഖ്യമന്ത്രിയും, അഭ്യന്തര മന്ത്രിയും എന്തിന് പ്രധാന മന്ത്രിപോലും ഇതിൽ ഇടപെട്ടു എന്ന് ഈ കേസ്സ് അന്വേഷിച്ച ഉദ്ദോഗസ്തർ ഹൈക്കോടതിയിൽ ബോധിപ്പിച്ചു.

ഇന്ന് കേരളം ഭരിക്കുന്നത് ഇടതുപക്ഷം ആയതിനാൽ ഇത്തരം ഇടപെടലുകൾ കേസന്വേഷ്ണത്തിൽ ഉണ്ടാവില്ല എന്നുപറയാം, ഈ തോന്നലായിരിക്കും ദീപികയുടെ “പരക്കെ “സംശയം എന്ന പ്രയോഗത്തിന് അടിസ്ഥാനം. എം.എ. ബേബി സഭയ്ക്കെതിരെ പ്രവർത്തിക്കുന്ന ആൾ എന്ന ലേബൽ ഉള്ള കമ്മ്യൂണിസ്റ്റാണല്ലോ ( സഭയ്ക്കെതിരെ എന്നാൽ സ്വാശ്രയ കോളേജുകൾക്കെതിരെ ( ഇവിടെ ധർമ്മാധർമ്മങ്ങൾക്ക് പ്രസ്ക്തിയില്ല) എന്ന ഒരു വിശാല അർത്ഥം ഉണ്ട്) ഈ മരണമാകട്ടെ സഭയ്ക്ക് വളരെ വേണ്ടപ്പെട്ടതും ! ഈ സമൂഹത്തിൽ ജീവിക്കുന്ന ഒരുവ്യക്തി എന്ന നിലയിൽ എനിക്ക് ഈ സംഭവത്തെ ഇങ്ങനെ നോക്കി കാണരുതോ “ കൃസ്ത്യാനി യായ ബേബി അരമനയുടെ ദൂദനായിട്ടാണ് അവിടെ ചുറ്റിക്കറങ്ങിയത്, അഭയ കേസ്സ് പോലെ ഇതും ഒതുക്കി തീർക്കാൻ, അനുഭവം ആണല്ലോ ഗുരു ഇങ്ങനെ പലരും അന്ന് അഭയയുടെ വീട്ടിൽ കറങ്ങി നടന്നിരുന്നു“

ഏതെങ്കിലും ഒരുമതത്തെ ചെളിവാരി എറിയുന്നതിൽ ആനന്ദിക്കുന്നവരല്ല കമ്മ്യൂണിസ്റ്റുകൾ, എന്നാൽ സമൂഹത്തിന് നേരെ ചെളിയും അമേദ്യവും വാരി എറിഞ്ഞാൽ അത് കയ്യും കെട്ടി നോക്കി നിൽക്കില്ല. കഴിഞ്ഞകാല സംഭവങ്ങളിൽ നിന്നും സഭയ്ക്ക് അത് മനസ്സിലായി കാണും എന്നു കരുതുന്നു, ഇന്ന് ഇടതുപക്ഷത്തെ വലത്തോട്ട് നടത്താൻ ചിലർ ശ്രമിക്കുന്നുണ്ട്, പക്ഷെ അക്കൂട്ടത്തിൽ എല്ലാവരു ഉണ്ടാകും എന്ന് ധരിക്കരുത്, കൃസ്തുവിന്റെ കാലത്തും ചിലർ വലത്തോട്ട് നടന്നിരുന്നു. സമൂഹത്തിൽ ആപത്ത് ഉണ്ടാകുമ്പോൾ (അത് വ്യക്തിക്കോ സമൂഹത്തിന് തന്നെയോ) ആദ്യം ഓടി എത്തിയിട്ടുള്ളത് കമ്മ്യൂണിസ്റ്റുകൾ തന്നെയാണ്, അതുകൊണ്ടാണ് അത്യാഹിതങ്ങളിൽ കമ്മ്യൂണിസ്റ്റ് സാന്നിദ്ധ്യം ഉണ്ടാകുന്നത് അല്ലാതെ കേസ്സ് ഒതുക്കാനല്ല. ശത്രുപക്ഷത്ത് നിർത്തിയിരിക്കുന്നവരെ കാണുമ്പോൾ കർത്താവിന്റെ ഉപദേശം മറക്കുന്നത് ഇതാദ്യമല്ലല്ലോ, അത്തരം ഒരു പീഠനാനുഭവം ആണല്ലോ വിമോചനസമരം എന്ന അധമപ്രവർത്തി.

പിന്നെ വനിതാകമ്മീഷന്റെ മേൽ ഉള്ള രോഷപ്രകടനം എന്തുകൊണ്ടാണെന്ന് സമൂഹത്തിന് നന്നായറിയാം “ കന്യാസ്ത്രീയുടെ പ്രായം നിശ്ചയിക്കാൻ വനിതാകമ്മീഷൻ ആര് “ എന്ന ചോദ്യം സഭയും സഭയോട് മാത്രം താല്പര്യം ഉള്ളവരും ഉയർത്തികൊണ്ട് വന്നതാണ്, ഇത് വളരെ ഏറെ തലങ്ങളിൽ ചെർച്ച ചെയ്യപ്പെട്ട ഒന്നാണ്. സഭാ വിരോധം കൊണ്ട് കമ്മ്യൂണിസ്റ്റുകൾ ഉയർത്തിക്കൊണ്ട് വന്ന കുത്തി

ത്തിരിപ്പ് എന്നു വരെ വിശേഷിപ്പിച്ചു.

ഇവിടുത്തെ സഭാ വിശ്വാസികളും സഭയുടെ വക്താക്കളോടും ചോദിക്കട്ടെ, എന്തായിരുന്നു ജസ്റ്റീസ്സ് ശ്രീദേവി അടങ്ങുന്ന വനിതാ കമ്മീഷൻ അംഗങ്ങൾ കന്യാസ്ത്രീ ആകാൻ ആഗ്രഹിക്കുന്ന പെൺകുട്ടികളുടെ പ്രായം 18 (പ്രായ പൂർത്തി ആയിട്ടുള്ളവർ) കഴിഞ്ഞിട്ടുണ്ടായിരിക്കണം എന്ന് പറയാൻ ഉണ്ടായ സാഹചര്യം ?, കണ്ണൻ ദേവൻ ടീ കുടിച്ചുകഴിഞ്ഞപ്പോൾ ഉണ്ടായ ഉന്മേഷത്തിൽ എടുത്ത തീരുമാനമായിരുന്നോ ഇത്. സഭയുടെ വക്താക്കളിലേയ്ക്ക് ഇടുങ്ങിയ കുഴലിലൂടെ ദൃഷ്ടീഭവിക്കുന്നകാഴ്ച്ചകൾ ആണ് ഇവ. ഊഹാ പോഹങ്ങളിലൂടെ എടുത്ത ഒരു വീക്ഷണമായിരുന്നില്ല വനിതാകമ്മീഷന്റേത്. പരാതിക്കാരും, പരാതിക്കാരിയുടെ പരാതിയിൽ കഴമ്പും ഉണ്ടെന്ന് വിശ്വാസമുള്ളതിനൽ ആണ് വനിതാകമ്മീഷൻ തുടർ നടപടി സ്വീകരിച്ചത്, അതിനെതിരെ ഒട്ടും വർഗ്ഗീയത ഇല്ലാത്ത കൃസ്ത്യാനി കോൺഗ്രസ്സ് ( കേരള കോൺഗ്രസ്സ്) നേതൃത്വത്തിലും പിന്നെ ദേശീയ പാർട്ടിയുടെ നേതൃത്വത്തിലും പ്രതിക്ഷേതവുമായി രംഗത്തെത്തി. വനിതാക്കമ്മീഷന്റെ കണ്ടെത്തൽ പൂർണ്ണമായും അശാസ്ത്രീയവും, വിവേകരഹിതവും അസഹിഷ്ണുതപരവുമാണന്നൊക്കെ ഉദാഹരണ സാക്ഷ്യങ്ങൾ സഹിതം സഭ വിവരിച്ചു, ദൈവത്തിന്റെ കണ്ണും, വായും മൂടനോ, ആ കൈകൾ ബന്ധിക്കാനോ സഭക്കാകില്ലല്ലോ. അതിന്റെ വെളിപ്പെടുത്തൽ ആണ്, അനുപമ മേരി എന്ന ഒരു പാവം പെൺകുട്ടിയുടെ അന്ത്യത്തിൽ കലാശിച്ചത്.,

ഇനീ സഭയുടെ വക്താക്കൾ പറയട്ടെ ശ്രീദേവിയുടെ കണ്ടെത്തലുകൾ വ്യാജമായിരുന്നോ. പക്വമായ മനസ്സിനെ തിരുവസ്ത്രം അണിയാൻ കഴിയു എങ്കിൽ ആ പക്വമായ മനസ്സായിരുന്നോ അനുപമയെ ജീവനൊടുക്കാൻ ( അതോ ഒടുക്കയതോ) പ്രേരിപ്പിച്ചത് ? ഭക്തിമാർഗ്ഗം ജീവിക്കാൻ ആഗ്രഹിച്ച സ്ത്രീ എന്തിന് ജീവത്യാഗം ചെയ്യണം, ഭ്രൂണഹത്യക്കെതിരെ ബൈബിളിലെ വരികൾ ഉദ്ധരിച്ച് മുഴുനീളെ പ്രസംഗിക്കുന്നവർ പൂർണ്ണവളർച്ച എത്തിയ മനുഷ്യനെ സ്വയം ഹത്യയിലെയ്ക്ക് തള്ളിവിടുന്നത് ഏത് ധാർമ്മികതയാണ്, ഏത് വിശ്വാസത്തിന്റെ പിൻ ബലമാണ് ? ലജ്ജയില്ലെ നിങ്ങൾക്ക് ? സിസ്റ്റർ അഭയമുതൽ ഇന്നലെ ജീവൻ നഷ്ടപ്പെട്ട ബിന്ദു എന്ന അനുപമ മേരിവരെ എത്ര ജീവൻ കൊല്ലപ്പെടുകയോ സ്വയം ഇല്ലാതാകുകയോ ചെയ്തു.

പണ്ട് നേർച്ചയായി പെൺകുട്ടികൾ കന്യാമഠങ്ങളിലേയ്ക്ക് നയിക്കപ്പെട്ടിരുന്നു. പിന്നീട് അതിന് മാറ്റം വന്നു ഇപ്പോൾ പെൺകുട്ടികൾ സ്വയമനസ്സാലെ കന്യാസ്ത്രീ ആകാൻ തയ്യാറാവുന്നു (എല്ലാവരും ഭകതി ഇല്ലാത്തവർ ആണ് എന്ന അർത്ഥത്തിൽ കാണരുത്, ഇതിൽ ഭക്തി രസം കുറവാണ്, കാരണം ഇവർക്കിടയിൽ വ്യക്തമായ ഒരു പഠനം നടത്തിയാൽ ഇവർ ഇങ്ങനെ ഒരു തീരുമാനം എടുത്തതിന് പിന്നിൽ എന്താണ് എന്ന് മനസ്സിലാകും ഇതിന് സഭ തയ്യാറകുമോ ? ഒരു തിരശ്ശിലയ്ക്ക് പിന്നിൽ നിന്ന് ഇതെല്ലാം അവർ പച്ചയായി വിളിച്ചു പറയും ഭയം ഇല്ലാതിരിന്നാൽ (ഭീഷണി) ) തിരുവസ്ത്രം അണിഞ്ഞതിന് ശേഷവും അതിന് മുൻപുമായി നിരവധി പെൺകുട്ടികൾ ഇതിൽ നിന്നും പിന്തിരിഞ്ഞതായി നമുക്ക് കാണാൻ കഴിയും.

സഭയുടെ വക്താക്കൾ പറയുന്നത്, ഒരുപെൺകുട്ടി തിരുവസ്ത്രം അണിയുന്നത് അവർക്ക് ഏകദേശം 22 വയസ്സ് ഉള്ളപ്പോൾ ആണ് അപ്പോൾ എങ്ങനെ ആണ് ജസ്റ്റീസിന്റെ അല്ലങ്കിൽ വനിതാകമ്മീഷന്റെ കണ്ടെത്തലുകൾ അംഗീകരിക്കാനാവും ഇത് നിലനിക്കുന്നതല്ല എന്നതാണ് അവരുടെ വാദം, യഥാർത്ഥത്തിൽ അതിനും എത്രയോ മുൻപേ ആകുട്ടി ഇതിനായുള്ള തയ്യാറെടുപ്പുകൾ തുടങ്ങിയിരിക്കും. ഈ പെൺകുട്ടി പ്രായപൂർത്തിയാകുന്നതിന് മുൻപുതന്നെ സന്യാസിനി സമൂഹചുറ്റുപാടിൽ എത്തപ്പെടുന്നു ( അതുകൊണ്ടാണല്ലോ വനിതാകമ്മീഷൻ ഇങ്ങനെ ഒരു അഭിപ്രായ പ്രകടനം നടത്തിയത്) ആ ചുറ്റുപാടിൽ ആ കുട്ടി സാവധാനം പുതിയ സംവിധാനവുമായി പൊരുത്തപ്പെടുന്നു., അതുതന്നെയാണ് സഭ ആഗ്രഹിക്കുന്നതും. ചില അവസരങ്ങളിൽ ഇത്തരം പൊരുത്തപ്പെടലിൽ നിന്നും വർവേർപിരിയേണ്ടിവരുന്നു, ഇക്കൂട്ടർ ആണ് പുറന്തള്ളപ്പെടുകയോ സ്വയം പുറത്ത് പോകുകയോ അല്ലങ്കിൽ, ജീവിതം തന്നെ അവസാനിപ്പിക്കാൻ നിർബന്ധിതാരാകുകയോ ചെയ്യുന്നത്.

സമൂഹത്തിലോ, കുടുംബത്തിലോ ഉണ്ടാകുന്ന പ്രശ്നങ്ങളിൽ നിന്നും രക്ഷപെടാൻ സന്യാസിനി സമൂഹത്തിൽ അഭയം പ്രാപിക്കുന്ന പെൺകുട്ടികൾ ധാരാളം ഉണ്ട്, വ്യക്തിപരമായ പ്രശ്നങ്ങളിൽ നിന്നും ഒളിച്ചോടി ചെന്നെത്താനുള്ള സ്ഥലമായി സന്യാസിനി മഠങ്ങൾ മാറരുത്, അതിന്റെ പരിപാവനത്യ്ക്ക് ഇത്തരം പ്രവണതകൾ എന്നും കളങ്കമായിരിക്കും. സഭയുടെ അച്ചടക്ക നടപടി ശാരിരിക മാനസ്സിക പീഠനങ്ങളിലേയ്ക്ക് വഴി മാറിപോകുന്നു എന്നതിന്റെ അവസാനത്തെ ( അങ്ങനെ ആകട്ടെ എന്ന് പ്രത്യാശിക്കാം) ഉദാഹരണമാണ് അനുപമ മേരി. കർത്താവിന്റെ മണവാട്ടി ആകാൻ അർഹത ഉള്ളവരെ മാത്രം തിരഞ്ഞെടുക്കു അതുവഴി ഈ സമൂഹത്തിൽ നിന്നും ദുർമരണങ്ങൾ ഒഴിവാക്കാം, ഇത്തരം പ്രവർത്തിയിലൂടെ സന്യാസിനി സമൂഹത്തിന്റെ അംഗബലത്തിൽ കുറവ് വരാം എന്നാൽ അവരുടെ പേരിന് കളങ്കം ഉണ്ടാകില്ല ( വരുമാനം കുറയുന്നതിൽ പരിഭവമില്ലെങ്കിൽ)

പിന്നെ പ്രസ്തുത വാ‍ർത്തയിൽ ഒരുകാര്യം കൂടെ ലേഖകൻ പറയുന്നുണ്ട്, അനുപമയുടെ ആത്മഹത്യാകുറിപ്പിൽ സംശയരോഗം ഉണ്ടെന്ന് പറയുന്ന 72 കാരി കന്യാസ്ത്രീയും, മറ്റ് കന്യാസ്ത്രീകളും മനുഷ്യാവശമുള്ളവരാണെന്ന കാര്യം കമ്മീഷൻ മറന്നോ എന്ന് സിസ്റ്റർ മാരുടെ ചോദ്യവും കമ്മീഷൻ കേട്ടില്ല. കൂടാതെ മറ്റൊരു പാതകവും കൂടെ കമ്മീഷൻ ചെയ്തു അതായത് കൊല്ലത്തുപോയി മരിച്ച അല്ലെങ്കിൽ കൊല്ലപ്പെട്ട അനുപമയുടെ വീട്ടിൽ അവരുടെ മാതാപിതാക്കളെ സമാധാനിപ്പിച്ചു, “ ചങ്ങനാശ്ശേരി തിരുമേനി ഇങ്ങനെ പറയാതിരുന്നത് ഭാഗ്യം കൃസ്ത്യാനികളെ കൃത്യാനികൾ സമാധാനിപ്പിച്ചാൽ മതി എന്ന് “

ദീപികയുടെ ഈ ലേഖകനോട് ഒരു കാര്യം ചോദിക്കട്ടെ, ആരാണ് മനുഷ്യാവകാശകമ്മിഷന്റെ അനൂകൂല്ല്യത്തിന് അർഹത ഉള്ളവർ.. അകാലത്തിൽ ഒരു പെൺകുട്ടിയെ മരണത്തിലേയ്ക്ക് കൈപിടിച്ച് ഉയർത്തിയവരോ ? മതങ്ങൾക്ക് മനുഷ്യനെ മാറ്റാൻ ആവില്ല എന്ന് സ്വന്തം ക്രൂരതകളിലൂടെ വിളിച്ചു പറഞ്ഞ മറയൂർ കേസിലെ പ്രതി റെജികുമാറോ ? കുറ്റവാളികൾ എന്ന് ബോധ്യമായവർക്ക് യാതൊരു മനുഷ്യാവകാശ അനുകൂല്ല്യങ്ങളും നൽകേണ്ടതില്ല നിയമം അനുശാസിക്കുന്നതൊഴികെ. തെറ്റു ചെയ്യുന്നത് പാതിരി ആയാലും കന്യാസ്ത്രീ ആയാലും മുസ്ലിയാരോ പൂജാരിയോ ആയിക്കൊള്ളട്ടെ, ഇവർക്ക് നലകപ്പെടുന്ന ശിക്ഷ ഒരു ശരാശരി മനുഷ്യന് നലുന്നതിന്റെ ഇരട്ടി ആയിരിക്കണം, കാരാണം അവരാൽ ആ സമൂഹം നയിക്കപ്പെടുന്നത് തെറ്റായ ദിശയിൽ ആയിരിക്കും

വിശപ്പുള്ളവർക്കായ് ഭക്ഷണം നൽകപ്പെടട്ടെ !

വീ.കെ.ബാല

14082008

പൊക്കമില്ലാത്തവന്റെ പൊക്കം

August 12, 2008

പൊക്കമില്ലാത്തവന്റെ പൊക്കം

അഭിനവ് ബിന്ദ്ര നേടിതന്നത് ഒളിമങ്ങാത്ത ഒരു ചരിത്ര മുഹൂർത്തം മാത്രമല്ല, നൂറ്റമ്പത് കോടി ജനങ്ങളെ വലിയ ഒരു നാണക്കേടിൽ നിന്നും രക്ഷിക്കുകയും ചെയ്തു, ഭാരതത്തിന്റെ അഭിമാന നക്ഷത്രമേ അങ്ങേയ്ക്ക് ഞങ്ങളുടെ പ്രണാമം ഭാരതിയരായ എല്ലാവരും നിങ്ങളെ സല്യൂട്ട് ചെയ്യുന്നു

ചരിത്രം വളച്ചൊടിക്കപ്പെടുന്നു

August 12, 2008

രിത്രം വളച്ചൊടിക്കപ്പെടുന്നു

കേരളസർക്കാരിനെ കൊണ്ട് ഏഴാം ക്ലാസ്സിലെ സാമൂഹ്യ പാഠപുസ്തകം പിൻ‌വലിപ്പിക്കാൻ സാധിക്കാത്തത് കേരളത്തിന് അപമാനകരവും സമൂഹത്തിന്റെ ധാർമ്മിക അധപതനത്തിന്റെ തെളിവുമാണെന്നാണ് മലങ്കര റിലിജിയസ് കോൺഫ്രൻസിന്റെ കണ്ടെത്തൽ ?!, ചരിത്രപരമായ കണ്ടെത്തൽ ഇനിയും നീളുന്നു. ചരിത്രം വളച്ചൊടിക്കപ്പെട്ടു!? ധാർമ്മിക മൂല്ല്യങ്ങൾ കളങ്കപ്പെടുത്തുന്നു, മതനിഷേധവും, നിരീശ്വരവാദവും പിഞ്ചുമനസ്സുകളിൽ കുത്തിവയ്ക്കുന്നു (ഡിസ്പ്പോസ്സിബിൾ സിറിഞ്ചാണോ ? ആവോ) ഇവിടം കൊണ്ടും കണ്ടുപിടുത്തങ്ങൾ അവസാനിക്കുന്നില്ല ഏറ്റവും പ്രസ്ക്തമായ ഭാഗമാണ് അടുത്തത് കുഞ്ഞുങ്ങളിൽ അക്രാമാസക്തി വളരാൻ പ്രേരിപ്പിക്കുന്നതാണ് ഈ പുസ്തകം…….

എങ്ങനായിരുന്നു എം. അർ.സി ഈ കണ്ടെത്തലുകൾ നടത്തിയത്, മുൻ‌വിധിയോടു കൂടിയുള്ള സമീപനമായിരുന്നോ അതോ ബൈബിളിനെ മുൻ നിർത്തി നടത്തിയ പഠനമാണോ ഇനി അതുമല്ല അനുഭവത്തിന്റെ വെളിച്ചത്തിൽ ആണോ, വർഷങ്ങൾക്ക് മുൻപ് അമേരിക്കയിൽ ഒരു വ്യക്തി ബൈബിൾ ഉയർത്തികാട്ടി ഒരു അവകാശവാദം ഉന്നയിച്ചു, “ നിങ്ങൾ ദൈവത്തിൽ വിശ്വസിക്കുന്നുണ്ടോ, നിങ്ങൾ ബൈബിളിൽ വിശ്വസിക്കുന്നുണ്ടോ.? ഉണ്ടെങ്കിൽ ഞാൻ ദൈവപുത്രനായ യേശു ആണ്, നിങ്ങൾ എന്നെ വിശ്വസിക്കുന്നില്ലെങ്കിൽ നിങ്ങൾ ഒരു ദൈവ വിശ്വാസിഅല്ല. നിങ്ങൾ ബൈബിളിലും വിശ്വസിക്കുന്നില്ല “ അയാളുടെ വാക്കുകളെ ആരും മുഖവിലക്കെടുത്തില്ല എന്നുമാത്രമല്ല അയാൾക്ക് വേണ്ട ചികിത്സ സമൂഹം നൽകി. ഈ ന്യൂയോർക്ക് പ്രഭാഷണങ്ങൾ തന്നെയല്ലെ എം.ആർ.സി യുടെ ശുഷ്ക്കമായ കണ്ടെത്തലുകൾ

ഏഴാം ക്ലാസ്സിലെ പുസ്തകം വായിച്ചിട്ടാണോ മലപ്പുറത്ത് അദ്ധ്യാപകനെ ചവുട്ടികൊന്നത് ? വിശുദ്ധ ഗ്രന്ഥങ്ങളുടെ വിശുദ്ധമായ വരികൾ ഉൾക്കൊള്ളിച്ച പാഠ പുസ്തകം തെരുവിൽ ചുട്ടുകരിച്ചപ്പോൾ എവിടെ ആയിരുന്നു ഈ ധാർമ്മികതയുടേയും, സംസ്കാരികതയുടേയും മൊത്തവ്യാപാരികൾ, ഇറാക്കിൽ അമേരിക്കക്കാർ ഖുർ‌ആൻ എന്ന വിശുദ്ധ പുസ്തകത്തെ അപമാനിച്ചു എന്നു പറയുന്നവർ അതേ ഖുർ‌ആനിലെ വരികൾ കുറിച്ച ഏഴാം ക്ലാസിലെ പാഠ പുസ്തകം കാലുകൊണ്ട് ചവിട്ടുകയും അതിൽ കാറിതുപ്പുകയും ചെയ്തപ്പോൾ എവിടെ ആയിരുന്നു നിങ്ങളിലെ ദൈവവിശ്വാസികൾ ?

ഇവരെ നയിച്ചവരും ആഹ്വാനം ചെയ്തവരും ഈ കുട്ടികളിൽ ( 60 വയസ്സിന് മുകളിൽ പ്രായമുള്ളവർ വരെ ഈ വിദ്യാർത്ഥി സമൂഹത്തിൽ ഉണ്ടായിരുന്നു) കുത്തിവച്ചത് ഏത് വിഷമായിരുന്നു, വർഗ്ഗിയതയുടേയോ അതോ കമ്മ്യൂണിസ്റ്റ് വിരുദ്ധതയുടേയോ!? ഒരാൾ ഈശ്വരവിശ്വാസിയാണോ അല്ലയോഎന്നത് തീരുമാനിക്കുന്നത് ഇവിടുത്തെ കൃസ്തീയ സഭകളോ സമാനതകളുള്ള മറ്റ് സ്ഥാപനങ്ങളോ, സമൂഹം പോലുമോ അല്ല. ആ വ്യക്തി മാത്രമാണ്, മതവിശ്വാസവും ദൈവ വിശ്വാസം രണ്ടാണ് എന്നതിൽ മെത്രാന്മാർക്ക് സംശയം ഉണ്ട് എന്നു തോന്നുന്നില്ല (മത വിശ്വാസികളിൽ പലരും ദൈവ വിശ്വാസികളല്ല എന്നത് ഒരു നഗ്നസത്യാമാണ് ). ഒരു വ്യക്തിയിൽ പ്രാധമികമായി ദൈവ വിശ്വാസത്തിന്റെ ബീജവാപം നടത്തുന്നത് മതാടിസ്ഥാനത്തിൽ തന്നെ അത് അംഗീകരിക്കുന്നു. ഒരുകുട്ടി ജനിക്കുമ്പോൾ മുതൽ അവനിൽ ദൈവത്തിന്റെ പേരിലുള്ള സന്ദേശങ്ങളും വാക്യങ്ങളും അടിച്ചേൽ‌പ്പിക്കുന്നു, വീട്ടിൽ നിന്നും തുടങ്ങുന്ന ഈ പ്രവണത ആ പ്രത്യേഗ സമൂഹത്തിൽ (മത സമൂഹം) നിന്നും അവനിലേയ്ക്ക് തെറ്റോ ശരിയോ ആയ ആശയങ്ങൾ സന്നിവേശിപ്പിക്കപ്പെടുന്നു. വളരുന്ന പ്രായത്തിൽ അവനിലേയ്ക്ക് എത്തപ്പേടുന്ന അറിവുകൾ അത് ശരിയായാലും തെറ്റായാലും അവൻ ഉൾക്കൊള്ളുന്നു, ശരിയായ വിദ്യാഭ്യാസം കിട്ടുമ്പോൾ അവൻ ശരിയായിട്ടുള്ളവയെ സ്വീകരിക്കുകയും അല്ലാത്തവ തള്ളിക്കളയുകയും ചെയ്യുന്നു.

ഇവിടെ സഭയ്ക്കും മറ്റ് മത സ്ഥാപനങ്ങൾക്കും ഉള്ള ഭയം പുതിയ തലമുറ ഏത് സ്വീകരിക്കും എന്നുള്ളതാണ്, ശാസ്ത്രീയമായ അടിത്തറ ഉള്ളതോ, വിശ്വാസപരമായ അടിത്തറ ഉള്ളതോ ? ഹൈന്ദവ വിശ്വാസപ്രകാരം വെള്ളത്തിൽ ഓളിപ്പിച്ച ഭൂമിയെ വീണ്ടെടുക്കാനാണ് മഹാവിഷ്ണു വരാഹാവതാരം എടുത്തത് എന്നാണ് ഞാൻ പഠിച്ചതും എന്റെ കുഞ്ഞിനെ പഠിപ്പിച്ചതും ഇങ്ങനെ തന്നെ എന്നാൽ വിദ്യാഭ്യാസം എന്നെ ബോധവാനാക്കി ജലം എന്നത് അല്ലങ്കിൽ വെള്ളം എന്നത് ഭൂമിയിൽ നിന്നും വേറിട്ട ഒരവസ്ഥ അല്ല അതുകൊണ്ട് എന്റെ ദൈവവിശ്വാസത്തിന് എന്തെങ്കിലും കോട്ടം വന്നു എന്ന് വിശ്വസിക്കുന്നില്ല. മതങ്ങൾ പഠിപ്പിക്കുന്ന അബദ്ധ പഞ്ചാംഗംങ്ങളെ, ആ വ്യക്തിയുടെ ഈശ്വര വിശ്വാസത്തിന് കോട്ടം വരാത്ത രീതിയിൽ പാഠപുസ്തകങ്ങൾ തിരുത്തുന്നു.

ആദാമിന്റെ വാരി‌എല്ലിൽ നിന്നുമാണ് സ്ത്രീയെ സൃഷ്ടിച്ചത് എന്ന് പഴയനിയമം ഉൽ‌പ്പത്തിയിൽ പഠിപ്പിക്കുന്നു, ഡാർവ്വിന്റെ പരിണാമ സിദ്ധാന്തം പഠിച്ച കൃസ്ത്യാനിയായ . വിദ്യാർത്ഥിയുടെ ദൈവ വിശ്വാസം തകർക്കപ്പെട്ടോ ? പച്ചമലയാളത്തിൽ പറഞ്ഞാൽ ബൈബിളിൽ പറഞ്ഞത് കളവാണ് എന്ന് പറയുന്നതല്ലെ ഡാർവ്വിന്റെ സിദ്ധാന്തം അത്രയും മത നിന്ദ ഏതായാലും ഈ പാഠ പുസ്തകത്തിൽ നിന്നും പ്രതീക്ഷിക്കുന്നില്ല. പിന്നെ സഭയുടെ ഈ നിലപാടിന് ചരിത്രപരമായ ഒരു ബന്ധം ഉണ്ട് ജബ്ബാർ മാഷിന്റെ ഒരുലേഖനത്തിലേയ്ക്ക് ഞാൻ നിങ്ങളെ ക്ഷണിക്കുന്നു. എനിക്ക് പറയാനുള്ളവ അദ്ദേഹത്തിന്റെ ബ്ലോഗിൽ കുറച്ചുകൂടെ ആധികാരികമായി കൊടുത്തിക്കുന്നതിനാൽ ഞാൻ അത് വീണ്ടും എഴുതി സമയം കളയുന്നില്ല http://yukthivadam.blogspot.com/2007/09/blog-post_12.html എം.ആർ.സി പ്രസിഡന്റ്‌ വില്ല്യം നെടുമ്പുറത്ത് ഓ.ഐ.സി ആഹ്വാനം ചെയ്തതാകട്ടെ നിരീശ്വരത്വവും, മത നിഷേധവും കൈമുതാലായുള്ള ഇക്കൂട്ടരെ സമൂഹ മനസാക്ഷി ഉയർത്തികാട്ടാൻ തലമുറകളായി ഈശ്വര വിശ്വാസികളായ കേരള ജനത ആർജ്ജവം കാണിക്കണമെന്ന്!? എന്താണാവോ മേൽ‌പ്പറഞ്ഞ വരികളിൽ ഉറങ്ങികിടക്കുന്ന വികാരം ? അടുത്ത തിരഞ്ഞെടുപ്പിന് ഒറ്റ കമ്മ്യൂണിസ്റ്റ് കാരനെ പോലും ജയിപ്പിക്കരുത്! ഇത്രയും കേട്ടാൽ പോരെ കുഞ്ഞൂഞ്ഞും, ചെന്നിത്തലയും അരമന പടിയിൽ കാവൽ കിടക്കാൻ,

ബഥനി ആശ്രമത്തിൽ നിന്നും പുറന്തള്ളപ്പെട്ട വാക്കുകൾ അതേ പോലെ പറഞ്ഞാൽ ( വാർത്ത ദീപിക ദിനപത്രം) സ്വന്തം പാർട്ടിയുടെ പ്രത്യയശാസ്ത്രത്തിന്റെ പ്രചരണത്തിനായി പ്രാഥമിക വിദ്യാഭ്യാസ പാഠപുസ്തകങ്ങളെ കരുവാക്കുന്നത് നികൃഷ്ടമായ ( പണ്ട് പിണറായി ഉപയോഗിച്ച അതെ വാക്ക് അങ്ങനെ പകരത്തിന് പകരം ) പ്രവർത്തിയാണ് തങ്ങളൂടെ കുട്ടികളെ എന്തു പഠിപ്പിക്കണം എന്ന് അന്തിമ തീരുമാനമെടുക്കേണ്ടത് മാതാപിതാക്കൾ ആണ്

എന്നാണാവോ പാതിരിമാർക്ക് ഈ ബോധോദയം ഉണ്ടായത്. ( ഇന്ന് കേരളത്തിലെ കൃസ്തീയ സഭയിലെ തിരുമേനിമാർ ചെയ്യുന്നത് ചൊറികുത്തി വൃണമാക്കുകയാണ് പിന്നെ അതിന് മതേതരത്വം എന്ന് ഓമന പേരും ) അന്യരുടെ മതത്തെ ബഹുമാനിക്കുന്നതായി അഭിനിയിക്കുക അല്ലേ സമൂഹത്തിന് മുൻപിൽ ഇവർ ചെയ്യുന്നത്. ( അങ്ങനെ അല്ല എന്ന് പറഞ്ഞാലും അതാണ് സത്യം, അങ്ങനെ അല്ലങ്കിൽ ഇവർ ബൈബിളിനെ തള്ളിപ്പറയണം ) ഇതുവരെ കൃസ്ത്യൻ മാനേജ്‌മെന്റ് സ്കൂളുകളിൽ മേല്പറഞ്ഞ വാചകത്തിൽ അതിഷ്ഠിതമായ പാഠ്യ രീതി ആയിരുന്നോ സഭ അവലംബിച്ചത്? കൃസ്ത്യൻ സ്കൂളുകളിൽ പഠിക്കുന്ന അന്യ മതസ്തരായിട്ടുള്ള വിദ്യാർത്ഥികളുടെ പുസ്തകത്തിന്റെ കൂടെ ബൈബിളിന്റെ ഒരു കോപ്പി കൂടെ വയ്ക്കുന്നത് ഏത് മാതാ പിതാക്കളുടെ തീരുമാനത്തിന്റെ പിൻ ബലത്തിൽ ആണ് ? എന്റെ സഹോദരി മാർ പഠിച്ചത് ലിറ്റിൽ ഫ്ലവർ ഗേൾസ് ഹൈസ്കൂൾ പുളിംകുന്നിലാണ് അവിടെ നിന്നും ഇവരുടെ പാഠ പുസ്തകത്തിന്റെ ഒപ്പം നിരവധി തവണ ബൈബിൾ ഞാൻ കണ്ടെടിത്തുണ്ട്, ഞാൻ ഒരു ഹിന്ദുസമുദായ അംഗമാണ് പക്ഷേ ആ പുസ്തത്തിന് അതർഹിക്കുന്ന മാന്യതയോടെ ഞാൻ സൂക്ഷിച്ചു വച്ചു. ഇ വിടുത്തെ ഒരു കൃസ്ത്യൻ കുടുംബത്തിലെ കുട്ടിയുടെ കൈവശം ഒരു ഖുറാനോ, ഭഗവത് ഗീതയോ രാമായണമോ കൊടുത്തു വിട്ടിരുന്നെങ്കിൽ ഇവിടുത്തെ കൃസ്ത്യൻ സമൂഹം ഈ സംഭവത്തെ എങ്ങനെ കാണുമായിരുന്നു, എന്തിന് ഈശ്വര വിശ്വാസത്തിന്റെ പേരിൽ ളോഹയും പൊക്കികുത്തി തെരുവിലറങ്ങാൻ വെമ്പൽ കൊണ്ട്നിൽക്കുന്ന ചങ്ങനാശ്ശേരി അതിരൂപതയുടെ, മാർ പവ്വത്തിൽ തിരുമേനിയുടെ പ്രതികരണം എന്തായിരുന്നേനെ?

മേൽ‌പ്പറഞ്ഞ സംഭവം ഒറ്റതിരിഞ്ഞതല്ല, മിക്കവാറും എല്ലാ കൃസ്ത്യൻ മാനേജ്‌മെന്റ് സ്കൂളുകളിലും ഇത്തരം ചെറിയ മത പ്രചരണങ്ങൾ നടത്താറുണ്ട്. ( ഇതും ക്യാച്ച് ദ എംഗ്സ് പോളിസിയുടെ ഭാഗമാണോ) കേരളത്തിൽ ഹിന്ദുക്കൾ പാലിക്കുന്ന സംയമനം എല്ലാക്കലവും അതുപോലെ തുടരണമെന്നില്ല, പിന്നെ ഒരുകാര്യം ഇവിടെ ഊന്നിപ്പറയാതിരിക്കാൻ കഴിയില്ല, ഇന്ന് കേരളത്തിൽ ഇത്രയും ഒച്ച ഉയർത്തി ഇക്കൂട്ടർ സംസാരിക്കുന്നെങ്കിൽ അത് ഇവിടെ കമ്മ്യൂണിസ്റ്റുകൾ ജീവിച്ചിരിക്കുന്നതു കൊണ്ടാണെന്ന് പാതിരിമാർ മറക്കേണ്ട.! ഓറിസയിലും മറ്റ് നോർത്ത് ഇന്ത്യൻ സംസ്ഥാനങ്ങളിലും കൃസ്തീയ പുരോഹിതന്മാർക്ക് നേരെ അക്രമങ്ങൾ നടത്തിയിട്ട് ഇവിടെ ഒരു ഹർത്താൽ നടത്താനല്ലാതെ മറ്റെന്തെങ്കിലും ഇക്കൂട്ടർക്ക് കഴിഞ്ഞോ ? അതോ കേരളത്തിലെ പാതിരിമാർക്കെ നിയമവും നീതിന്യായ വ്യവസ്ഥയെ കുറുച്ച് അറിയത്തുള്ളോ ? അതോ ഒറീസയിലെ കൃസ്ത്യാനികൾ കേരളത്തിലെ പോലെ മത ന്യൂനപക്ഷത്തിന്റെ പരിധിയിൽ പെടില്ലെ. അനീതിക്കെതിരെ ശബ്ദമുയർത്തുക എന്നത് ഒരു കമ്മ്യൂണിസ്റ്റിന്റെ കടമയാണ് ( C.P.I (M) C.P.I തുടങ്ങിയ രാഷ്ട്രീയ പാർട്ടികളെ അല്ല ഞാൻ അർത്ഥമാക്കിയത്, പാർലമെന്റ‌റി മോഹമില്ലാത്ത ഒപ്പം തീവ്രവാത ചിന്താഗതിക്കരല്ലാത്ത എല്ലാ മനുഷ്യർക്കും നന്മ വരണം എന്നാഗ്രഹിക്കുന്ന ഒരു ജനത)

ബഥനി ആശ്രമത്തിൽ മറ്റൊരു നല്ല ചടങ്ങ്കൂടെ നടന്നു, മലങ്കര കത്തോലിക്ക സഭയിലെ സന്യാസി സന്യാസിനികളുടെ ഇടയിൽ ഭൌദികനിരീശ്വരവാദങ്ങൾക്കെതിരെ പ്രാർത്ഥന യജ്ഞത്തിന് തുടക്കം കുറിച്ചു,. ഇത്തരം നല്ല കാര്യങ്ങൾക്ക് എല്ലാ ഭാവുകങ്ങളും നേരുന്നു, ഏറ്റവും കുറഞ്ഞത് കേരളത്തിലെ ജനങ്ങളോട് മാർപ്പാപ്പയ്ക്ക് മാപ്പിരക്കാതെ നിവർന്ന് നിൽക്കാനാവട്ടെ

വീ.കെ .ബാല